Thursday, December 11, 2014

ကၠောန်ပေဲါထ္ၜးဆန္ဒကွာ်ဂၠံၚ် တာဒၞာကိုန်စဳအစီအဇန် ရုၚ်စက်တၟံချးအၚ်ဒၚ်ဏောၚ်

ဂွံတာဒၞာ ကိုန်စဳအစီအဇန် ရုၚ်စက်တၟံချး ကုမ္ပဏဳ Toyo Thai ရန်လဝ် ဒၞာဲကွာန်အၚ်ဒၚ်ဂှ် ဂိတုဒဳဇြေန်ဗာ ၁၄ ဏံမ္ဂး ပလေဝ်ပလေတ်လဝ် သွက်ဂွံကၠောန် ပေဲါထ္ၜးဆန္ဒနွံရောၚ် သာ်ဝွံ ညးအုပ်ကာ ဂကောံရေၚ်တၠုၚ်ဖဵုမှာဇန် ဍုၚ်ရေဝ် YSS ဥူအံၚ်နာၚ်ဝေန် ဟီုရ။
ပေဲါထ္ၜးဆန္ဒကွာ်ဂၠံၚ် သွက်ဂွံတာဒၞာ ရုၚ်စက်တၟံချးဂှ် နူကဵုဂကောံရေၚ်တၠုၚ်မှာဇန် ဍုၚ်ရေဝ် (YSS) အာက္ဍိုပ်တုဲ ကၠောန်သ္ပအာရောၚ် ဂးရ။
“ပိုယ်ပတိုန်လဝ်လိက်အာတ်အခေါၚ်တုဲမံၚ်ရဏောၚ်၊ ဂွံအခေါၚ်ကဵုဒှ်၊ ဟွံဂွံကဵုဒှ်၊ ကေမၠာန်ပိုယ်ဒးကၠောန်ဂှ်တှေ် ပိုယ်ကၠောန်အာရဏောၚ်၊ ဟွံဂွံအခေါၚ်လေဝ် ပေဲါထ္ၜးဆန္ဒဏံ ပိုယ်ကၠောန်အာဂှ်ရ” သာ်ဝွံ ဥူအံၚ်နာၚ်ဝေန် ဟီုရ။
ပေဲါထ္ၜးဆန္ဒဂှ် ပတဝ်အာက္ဍိုပ်ကဵု အလဵုအသဳကၟိန်ဍုၚ်၊ အလဵုအသဳတွဵုရးတံတုဲ၊ ကိုန်စဳအစီအဇန် နွံပၟိက်မံၚ် ပၟတ်လလဳ ပ္ဍဲကၟိန်ဍုၚ်ဂှ် နူကဵုအလဵုအသဳကၟိန်ဍုၚ်တေံ ဖျေံကဵုနၚ်အမိၚ်တုဲ နူအလဵုအသဳတွဵုရးတံဟေၚ် ဓမံက်အာရုပ်ရဴဂှ်ရ ပတဝ်အာက္ဍိုပ် သီုအလဵုအသဳၜါဂှ်ဏောၚ် သာ်ဝွံ ညးဆက်ဟီုရ။
“အစဳဇန်ပိုယ်ကၠောန်အာတံဂှ် ဂၠံၚ်ဍာန်ပိုယ်ထ္ၜးအာဆန္ဒတံ၊ ဇြဟတ်မၞိဟ်တံ၊ ရမျာၚ်ကရေဲတံ၊ ဂတဵုမုက်သီုဖအိုတ်တံ၊ နကဵုပါၚ်ဂှ် သ္ပလဝ်ဒတန်တုဲမံၚ်ယျ၊ ပိုယ်ပတိုန်လဝ်ကဵုရုၚ်သ္ကိုပ်ဗၠာဲသၟိၚ်ကဵု ခရိုၚ်တံရ၊ ဗၠာဲသၟိၚ်တံဂှ် တုပ်လဝ်စိုတ်နကဵုပါၚ်တုဲမံၚ်ရဏောၚ်” သာ်ဝွံ ဥူအံၚ်နာၚ်ဝေန် ဟီုရ။
အာတ်မိက်လဝ် ရမျာၚ်ကရေဲတံဂှ် "ကိုန်စဳအစီအဇန် ရုၚ်စက်တၟံချးအၚ်ဒၚ်ဂှ် ပလီုကဵု၊ ပလီုကဵု” “ပ္ဍဲဒေသရေဝ် ကိုန်စဳအစီအဇန် ရုၚ်စက်တၟံချးတၞဟ်လေဝ် ဟွံမွဲပၟိက်၊ ဟွံမွဲပၟိက်” “အနာဂတ်တေံ သွက်ပွဳပွူသဘာဝဂွံအးၚးဂှ် Toyo Thai တိတ်အာ၊ တိတ်အ” “သ္ဇိုၚ်သၞောဝ်ဥပဒေ ၄၅ ကဵု ၃၉၀ (ခ) ဒးဒ္ဂေတ်ဗက်ဂှ် ကေမၠာန်ပိုယ်” တံ ဂးရ။
ပေဲါထ္ၜးဆန္ဒကွာ်ဂၠံၚ်ဂှ် စတိတ်နူကဵု ပျဳသုယေန်ပျေန် သၠာတ်ကျာ်ယှိုဲဇြာန်ဒဝ် မၞုံဍုၚ်ရေဝ်ဂှ် နူဂှ် ကွာ်ဂၠံၚ်ထ္ၜးအာဆန္ဒ အရာပ်မၞုံပ္ဍဲဍုၚ်ရေဝ် ၆ အရာပ်တုဲ အစဳဇန်ပေဲါဟီုတွံ ကဵုပညာဂှ်လေဝ် ပံၚ်တောဲစုတ်အာ ကီုရောၚ်၊ မၞိဟ်ထ္ၜးဆန္ဒတံဂှ် လတက်ဏာပဠောံ တဆိပ် No Coal တုပ်တုပ်ဖအိုတ်ရောၚ် ဂွံတီကေတ်ရ။
“အတိုၚ်သ္ဇိုၚ်သၞောဝ် ၝောံပိုဒ် ၄၅ ဂှ် ပ္ဍဲကၟိန်ဍုၚ်ဝွံ ဒးမၚ်မွဲအာ ပရေၚ်ထိၚ်ဒဝ်ပွဳပွူသဘာဝရောၚ်၊ အတိုၚ်သ္ဇိုၚ်သၞောဝ် ၝောံပိုဒ် ၃၉၀ (ခ) ဂှ်၊ ဇၟာပ်ကောန်ဂကူနွံပ္ဍဲ ကၟိန်ဍုၚ် သွက်ဂွံထိၚ်ဒဝ် မၚ်မွဲအာ ပွဳပွူသဘာဝဂှ် တာလျိုၚ်နွံရောၚ်၊ ပွဳပွူပိုယ်ညံၚ်ဟွံဂွံလီု ရုၚ်စက်တၟံချးဂှ် ဒစဵုဒစးဏောၚ်၊ ကိုန်စဳအစီအဇန် ရုၚ်စက်တၟံချး ရန်လဝ်သွက်ဂွံသိုၚ်ဒၞာဲကွာန်အၚ်ဒၚ်ဂှ် ဟွံဒုၚ်တဲလးလးပုဟ်၊ ကိုန်စဳအစီအဇန် ရုၚ်စက်တၟံချးတၞဟ် သွက်ဂွံသိုၚ်ခၞံ ပ္ဍဲပွိုၚ်ဍုၚ်ရေဝ်ဂှ်လေဝ် ဟွံဒုၚ်တဲလးလးပုဟ်၊ ပွဳပွူသဘာဝဂွံအးၚးဂှ် ရုၚ်စက်တၟံချး ပိုယ်ဒးဒစဵုဒစး” ဗဳနာၚ်ပိုစတာတံဂှ် ရပ်ဏာပ္ဍဲပေဲါထ္ၜးဆန္ဒဂှ်ရောၚ်။
ပေဲါထ္ၜးဆန္ဒဝွံ ပွဳပွူ ဒၞာဲရုၚ်အုပ်ဓုပ်မၞုံပ္ဍဲဍုၚ်ရေဝ် အကြာၜိုတ်ကိုက် ၈၀၀ အာတ်လဝ်အခေါၚ် အရၚ်ဂွံတတ်အာကၠုၚ်ဂှ် နူကဵုအုပ်ဓုပ်ပွိုၚ်ဍုၚ် တအ် ဟွံကဵုလဝ်အခေါၚ်ပုဟ် ဂးရ။
နူကဵုကုမ္ပဏဳ Toyo Thai တအ် သွက်ဂွံသိုၚ်ရုၚ်စက်ကဵုဇြဟတ်ပၟတ် သုၚ်စောဲတၟံချးဂှ် ဗလိုက်အာတမ်ရိုဟ် ၜိုတ်ဒဝ်လာ ၂၇၀၀၀ ကိုဋ်တုဲ ဟိုတ်နူဖိုလ်ပရေံပရေံ ကၠုၚ်စိုပ်ဒၞာဲညးဒေသတံဂှ်ရ၊ ဒီုကဵုကိုန်စဳအစီအဇန်ဏံ ဒးဒေါအ် YSS ကၠောန်အာဆံၚ်ဆံၚ်ရောၚ် ဂးရ။
၂၀၁၈ ဂိတုဂျောန်တေံမ္ဂး ဟိုတ်နူရုၚ်စက်စဂေတ်မာန်ဂှ်ရ Toyo Thai တအ် ဂေတ်နကဵုနဲကဲ BOT တုဲ အရၚ်ဂွံသိုၚ်ရုၚ်စက်ဓါတ်ပၟတ်လလဳ သုၚ်စောဲတၟံချးဂှ် စၟတ်လဝ်အခိၚ်ကာလကိုန်စဳအစီအဇန် ၄၈ ဂိတုတုဲ စက်ဂှ်ဂေတ်ဗၞတ် ၃၀ သၞာံရောၚ် သာ်ဝွံ နူကဵုကုမ္မဏဳ လလောၚ်တြးလဝ်ရ။