 |
| ထားဝယ်ရေနက်ဆိပ်ကမ်း ဆောက်လုပ်မည့် နေရာကို ဇန်နဝါရီ ၃၀ ရက်နေ့က တွေ့ရစဉ် (ဓာတ်ပုံ - ဧရာဝတီ) |
“ပေ ၄၀x ၆၀ အကွက်က မြို့ပေါ်ဆိုရင် သိန်း ၂၀၀၀၊ ၃၀၀၀ ကနေ သိန်းတသောင်းကျော် အထိ ဈေးခေါ်တယ်။ ၀ယ်တဲ့သူတွေလည်း ရှိတယ်။ ဥပမာ- မက်စ်မြန်မာ ကုမ္ပဏီဆိုရင် မြို့ပေါ်မှာ သိန်းထောင်ချီပေးပြီး မြေကွက် ၀ယ်ထားတယ်။ ထားဝယ်ရေနက်စီမံကိန်း စလုပ်တုန်းကလည်း ခေါ်ဈေးတွေ တအားထိုးတက် သွားခဲ့ဖူးတယ်။ အဲဒီနောက်တော့ ပြန်ငြိမ်တယ်။ အခု ပြန်တက်လာတာ” ဟု သူက ဆိုသည်။
ဒုတိယ သမ္မတ သီဟသူရ ဦးတင်အောင်မြင့်ဦး လာရောက်ပြီး ထားဝယ်ရေနက် ဆိပ်ကမ်း စီမံကိန်းအတွက် လေယာဉ်ကွင်း ပြန်ပြင်ရေးနှင့် စီမံကိန်းကို ဆက်လက် အကောင်အထည်ဖော်မည့် အရိပ်အရောင်များ မြင်ရသောကြောင့် အေးနေသော အိမ်ခြံမြေဈေးများ ပြန်တက်လာခြင်းဖြစ်သည်ဟု ထားဝယ်မြို့ခံ တဦးက ရှင်းပြသည်။
ထားဝယ်မြို့ပေါ်တွင် ဈေးအကြီးဆုံး အိမ်ခြံမြေများမှာ အာဇာနည် လမ်းမပေါ်တွင် တည်ရှိပြီး ယင်းလမ်းတလျှောက်တွင် ပုဂ္ဂလိက ဘဏ်ခွဲအများဆုံး ဖွင့်လှစ်ထားကြောင်း၊ ဗိုလ်ချုပ်လမ်း၊ နိဗ္ဗာန်လမ်းတို့ရှိ အိမ်ခြံမြေနှင့် မြေကွက်များမှာလည်း ကျပ်သိန်း ထောင်ချီ ဈေးခေါ် ရောင်းဝယ်မှု ရှိကြောင်း စုံစမ်းသိရှိရသည်။
“မြို့ပေါ်တင်မကဘူး လေယာဉ်ကွင်းနားက ၀ဲကျွန်းမှာပါ မြေကွက်တွေ အရောင်းအ၀ယ် လိုက်လာတယ်။ လေယာဉ်ကွင်း ချဲ့ဖို့ကလည်း သိပ်မကြာခင် လုပ်မှာဆိုတော့ ရေနက်စီမံကိန်း ပီပြင်လာတာနဲ့အမျှ ထားဝယ်မြို့ပေါ်မှာလည်း အိမ်ဈေး၊ မြေဈေး တက်ဖို့ရှိတယ်” ဟု ထားဝယ်မြို့နေ အိမ်ခြံမြေ ၀ယ်ရောင်း ပွဲစားတဦးက ဆိုသည်။
 |
| စည်ကားနေသည့် ထားဝယ် စည်ပင်သာယာဈေးကြီး (ဓာတ်ပုံ - ဧရာဝတီ) |
ထားဝယ် ရေနက်စီမံကိန်းကို အီတာလျံ-ထိုင်း ကုမ္ပဏီက ရင်းနှီးမြှုပ်နှံထားပြီး ယခုအခါ ဂျပန်အပါအဝင် အာရှနိုင်ငံများက ရင်းနှီး မြှုပ်နှံရန် လေ့လာမှုများ ရှိနေကြောင်း၊ လက်ရှိတွင် စီမံကိန်းအတွက် မြေသားလမ်းများ ဖောက်လုပ်ခြင်း၊ စီမံကိန်း ဧရိယာ ရှင်းလင်းခြင်းတို့ ပြုလုပ်နေပြီး စီမံကိန်းအကြမ်းထည်ကို ထိုင်းနိုင်ငံမှ အင်ဂျင်နီယာနှင့် အလုပ်သမားများ၊ မြန်မာ အလုပ်သမားများ စုစုပေါင်း လုပ်သားအင်အား ထောင်ဂဏန်းကျော်ဖြင့် အင်တိုက်အားတိုက် ဆောင်ရွက်လျှက် ရှိသည်။
